Ang mga Produktong Kosmetiko at ang Kapakanan ng mga Mamimili

April 8, 2013

FDA ADVISORY NO. 007-13

 

Ang FDA, bilang ahensiya ng Kagawaran ng Kalusugan na nangunguna sa pangangalaga ng kapakanan ng mga mamimili, ay ibig ipaalam na ang pamantayan ng kalidad o pagiging ligtas ng isang kosmetiko o cosmetic ay nakapaloob sa "ASEAN Cosmetic Directive" (ACD). Ang ACD ay naaayon sa kasunduan na pag-aarmonya ng pamantayan hinggil sa kosmetiko ng mga miyembro ng samahan ng mga bansa sa Timog-Silangang Asya (ASEAN), kung saan miyembro ang Pilipinas.

Ang kosmetiko ay anumang sangkap o preparasyong inilaan upang mailagay sa iba't ibang panlabas na bahagi ng katawan, mga ngipin o loob ng lukab ng bibig na may layon na malinisan at mapabango ang mga ito. Ito rin ay ginagamit para mabago ang hitsura o maproteksiyonan ang ilang bahagi ng katawan. Ang kosmetiko ay ginagamit din bilang pabango at para panatilihin ang mabuting kalagayan ng katawan na malinis, malusog at kaaya-aya.

Ang mga kosmetiko ay ginagamit lamang para sa mga panlabas na parte ng katawan tulad ng balat, buhok, kuko, labi, bibig, ngipin at panlabas na bahagi ng ari. Lahat ng impormasyon tungkol sa tamang paggamit ng produkto ay mababasa sa label o etiketa ng produkto.

Para sa kaligtasan ng mamimili, mahalaga na ang kosmetiko ay dumaan sa pagsusuri ng FDA ng Pilipinas. Ang mga produkto ay dapat may pabatid o notification certificate mula sa FDA. Ang pabatid na ito ay isang katibayan na pinapayagan ng FDA na ang isang produkto ay maaring gamitin o ibenta sa Pilipinas. Ang mga mamimili ay nakakatiyak na ang produkto ay ginawa ayon sa alituntunin ng Good Manufacturing Practice. Ang mga mamimili ay may karapatang maghain ng reklamo laban sa mga kompanya kung magkaroon man ng hindi inaasahang epekto o reaksyon dulot ng produkto. DISaEA

Kung mayroong napansin na pamumula o pangangati ng balat matapos gumamit o maglagay ng lotion, sabon, pabango, shampoo, conditioner, make-up gaya ng blush-on, face foundation, mascara, at lipstick, ito ay hindi normal. Kung mayroong naranasan na pagbubutlig ng balat o anit pagkatapos magpaayos, magpakulot, magpaunat o magpakulay ng buhok, ito ay dapat ipapaalam sa FDA.

Inaabisuhan ang lahat ng mamimili na bumili ng mga kosmetiko na may pahintulot ng FDA at sa mga lehitimong tindahan lamang. Hinihikayat lahat ng mamimili na kung nakaranas ng hindi inaasahang epekto o reaksyon, kahit hindi nakasunod sa direction for use o tamang paggamit ng produkto, ipagbigay alam agad sa FDA. Mga produktong kulang sa timbang o laman, may masamang amoy at kakaibang hitsura, o may pagbabago sa kulay ay nararapat na ireklamo sa FDA.

Lahat ng reklamo ay maaring ipadala sa pamamagitan ng eReport sa FDA website (http://www.fda.gov.ph/ereport) o hindi kaya mag-email sa [email protected], o itawag sa mga numerong 857-1900 o 165-332. Maaari ring pumunta sa FDA, Civic Drive, Filinvest Corporate City, Alabang Muntinlupa City. Para sa mga mamimili na mula sa probinsiya, maaring makipag-ugnayan sa mga empleyado ng FDA sa naturang Center for Health Development (CHD) sa mga rehiyon.

Para maaksiyunan agad ng FDA, ang mga mamimili ay pinapakiusapan na ilahad ang mga sumusunod sa kanilang reklamo o ulat:

(1) Ang pangalan at contact number at address ng nagrereklamo;

(2) Ang kanilang edad at kasarian;

(3) Ang pangalan ng produkto na inirereklamo na ayon sa etiketa o label;

(4) Ang pangalan ng tindahan kung saan at kailan binili ang produkto at kung maari ay magbigay ng kopya ng resibo ng pinagbilhan;

(5) Ang detalye ng reklamo, ulat o naging banta sa kalusugan na naranasan o naramdamang kakaiba matapos gamitin ang produkto; at

(6) Ang mga hakbang na ginawa para malunasan o magamot ang kondisyon, at kung sino ang nagbigay ng pangunang lunas. HITAEC

Ang lahat ng mamimili ay nakakasiguro na ang impormasyong ibibigay tungkol sa katauhan o reklamo na idudulog sa FDA ay ituturing na lingid sa kaalaman ng iba. Lahat ng mga aksiyon at desisyon na ginawa ng FDA hinggil sa reklamo ay agad ipapaalam sa naghain ng reklamo.

(SGD.) KENNETH Y. HARTIGAN-GO, MDActing Director IV Food and Drug Administration